VIER mans is gisteroggend weens die onlangse moord
op mnr. Thomas Ferreira (54), boer en eienaar van die
Shell-vulstasie by die Tom’s Place-oord buite Bloemfontein, aangekeer.
Die vermoorde Ferreira se suster, Michelle, wat die aand van Sondag
27 November op haar broer se lyk afgekom het, sê een van die
vermeende moordenaars het vroeër vir hulle gewerk en sy het jare
gelede ook vir hom skoolgehou.
Lt.kol. Annelie Wrensch, polisiewoordvoerder, sê al vier die mans is
gister in die vroeë oggendure deur die polisie se direktoraat vir die
ondersoek van voorkeurmisdade (Valke) by hul huise in Batho en
Bloemspruit in hegtenis geneem.
Ferreira se selfoon, die enigste artikel wat geroof is toe hy vermoor
is op die plaas waarop hy grootgeword het, is ook deur die polisie teruggekry.
Wrensch sê die mans, almal in hul vroeë 30’s, sal Dinsdag in die
Bloemfonteinse landdroshof op aanklagte van moord en roof verskyn.
Wrensch sê die Valke verwag om nog verdagtes aan te keer. Sy sê die
polisie het ook op ’n voertuig beslag gelê wat na bewering in die aanval
gebruik is.
Ferreira is herhaaldelik deur sy plaashuis se kombuisdeur geskiet. Hy
het dit in sy swaar gewonde toestand reggekry om sy aanvallers af te
weer. In ’n poging om hulp by sy plaaswerkers te gaan soek, het hy
aan sy wonde beswyk.
Sy vrou, dr. Marita Ferreira, ’n lektor in Afrikaans aan die Sentrale
Universiteit vir Tegnologie, en sy dogter, Roux-Cil (22), wat pas haar
honneursgraad in aktuariële wetenskap aan die Universiteit van die
Vrystaat verwerf het, was nie op die plaas nie.
