Geregtigheid hét geskied, het me. Marianne Hopkins se familie gister
gesê nadat haar moordenaar, Richard Yeyani (28), lewenslank vir
dié “barbaarse moord” tronk toe gestuur is.
“Die dag met haar begrafnis het ek gebid dat reg en geregtigheid sou
geskied. Dit is wat vandag gebeur het. Hy het die swaarste straf gekry
,” het Hopkins se ma, mev. Reneé Carinus, gister op die trappe van die
Wes-Kaapse hooggeregshof gesê.
“Ons as familie is innig dankbaar vir die manier hoe die saak hanteer
is. Dit is met sagte hande gedoen. Ons is ook dankbaar vir elke
gebed wat ons deur hierdie tyd gedra het – want dít is hoe ons
hierdeur gekom het.”
Hopkins (47) is op 10 September verlede jaar in haar huis in Die
Boord op Stellenbosch verkrag en vermoor.
Marcus Thomas (22) en Xolani Michael Mdoyi (24) was staatsgetuies
nadat hulle in September skuld beken het en elk tot 25 jaar tronkstraf
gevonnis is.
Regter Siraj Desai het Yeyani as die baasbrein agter die aanvanklike
inbraak bestempel en gesê dit is om verskeie redes besonder moeilik
om enige simpatie met hom te hê. “Die mees voor-die-hand-liggende
rede is die erns van die misdade wat hy gepleeg het terwyl hy nog op
parool was en spesifiek ’n besonder gewelddadige misdaad teenoor
’n weerlose vrou,” het Desai gesê.
Yeyani is in 2002 weens verkragting tot 13 jaar tronkstraf gevonnis en
is in Desember 2009 op parool vrygelaat.
Desai het gesê Hopkins was ’n sagte en maklike teiken vir Yeyani –
iemand wat vir hom en sy ma ’n werk en inkomste verskaf en
vertroue in hom gestel het.
“Dit is moeilik om te begryp waarom hy homself in hierdie riskante
situasie met gevoellose verontagsaming van nie slegs die oorledene
se belange nie, maar ook van sy eie ma se belange begeef het.
Uit die aanvaarde getuienis blyk dit dat hy Hopkins moontlik nie
sou vermoor het as sy hom nie gesien en herken het nie.”
Yeyani het geen werklike berou getoon nie, het Desai verder gesê.
“Nieteenstaande die lang gevangenisstraf wat hy in die verlede opgelê
is vir wandade teenoor ’n vrou, het dit hom nie gerehabiliteer of
afgeskrik nie.”
