Die verkeersowerhede werk tans onverpoosd aan die samestelling van die finale
ongeluksyfers van die afgelope Kerstyd se padslagting. Daar is skynbaar ‘n
geringe afname in padsterftes naamlik 1 475 mense in 1 230 noodlottige
ongelukke.
Altesaam 70 % van hierdie ongelukke was reg van voor, wat daarop dui dat
Altesaam 70 % van hierdie ongelukke was reg van voor, wat daarop dui dat
minstens sommige nie die gevolg van ongelukkige omstandighede was nie,
maar wel van roekeloosheid.
Vanjaar is gekenmerk deur ‘n baie streng wetstoepassingsveldtog, wat goed
deur ‘n mediaveldtog ondersteun is. Onder die planne wat oorweeg word is
om bestuurders te belet om binne drie jaar na hulle hul rybewyse bekom het,
enige alkohol toe te laat wanneer hulle agter die stuurwiel inklim. Die
maksimum spoedperk mag dalk ook na 100 kilometer per uur verlaag word.
‘n Land kan egter die strengste wette hê; as dit nie toegepas word nie sal dit
steeds nie die padslagting verminder nie. Dit is noodsaaklik dat die leiers ‘n
voorbeeld stel – nie net ten opsigte van die berugte roekelose hoëspoed
blouligbrigades wat ander padverbruikers terroriseer nie, maar oor die
ganse spektrum. Rudy Giuliani se zero-verdraagsaamheid-veldtog na hy
in 1993 burgemeester van New York geword het word soms beskou as
die rede vir die afname in dié stad se misdaadkoers. Belangrike beginsels
is neergelê. Dit omvat die gedagte van kruipende misdaad – as
sogenaamde kleiner misdade straffeloos bly, word die saadjies van
kruipende aanvaarding en toleransie van ernstiger misdaad gesaai. Die
gedagte is om hierdie proses te stuit deur selfs die geringste oortreding as
‘n ernstige oortreding te behandel.
Die begrip dat leiers die verkeerde voorbeeld stel en tot algemene
ongehoorsaamheid teenoor die owerheid lei, staan as anomie bekend. Dit is
’n toestand van wetteloosheid voortspruitend uit ’n gebrek aan maatskaplike norme.
Dit tree in weens die verbrokkeling van die maatskaplike bande tussen mense.
Dit beskryf ook ’n gevoel van vervreemding voortspruitend uit die gevoel van
doelloosheid. Dit dui op ’n gebrek aan etiek of etiese kodes. Uit syfers wat die
Mediese Navorsingsraad uit nadoodse ondersoeke bekom, was 61% van die
voetgangers wat in ongelukke gesterf het, onder die invloed van tiermelk, en
59% van die bestuurders.
Dit lyk of padsterftes in Suid-Afrika per 100 000 van die bevolking aan die toeneem
is. In 2001 het Statistiek Suid-Afrika bereken dat die padsterftesyfer 9,9 per
100 000 van die bevolking was. In 2006 was dit 11,8, en volgens die jongste
internasionale syfers wat vir Suid-Afrika gebruik is, was dit onlangs 20,2. Dit maak
Suid-Afrika se paaie die 72ste gevaarlikste ter wêreld. Australië se koers is 6,8, dié
van Nederland slegs 4 en Japan 3,8.
Strenger wetstoepassing en meer beperkende wette sal help, maar solank die
owerhede nie oor die hele morele spektrum die voorbeeld stel nie, sal al die
pogings om te keer dat nog meer mense die huis deur middel van die koerante
haal, vergelyk kan word met pogings om die see met ‘n paraffienpompie leeg te pomp.
