weggekruip het, was ’n geskreeu en gestoei, breekware en glas
wat breek en skote.
Hilda Fourie
Wat Deleni Walters en Simoné Wolmarans (albei 17) gehoor het, was drie rowers
wat onderskeidelik Deleni se ouma op die grond neergegooi het, met haar pa
gestoei het en haar oupa geskiet het.
Kol. Joks van der Merwe (71), ’n afgetrede polisie-offisier, is in die hoësorgeenheid
van ’n Pretoriase hospitaal nadat hy in die maag geskiet en die koeël deur sy
been is.
Mnr. Braam Walters het kort ná die huisrooftog eergisteroggend in Florauna in
die noorde van Pretoria gehelp om sy skoonpa se aanvallers te vang.
Een van dié mans, wie se ma ’n tolk by die Pretoriase landdroshof is, het aan
die polisie erken hy is ’n satanis, het konst. Maanda Singo, polisiewoordvoerder,
gesê.
Mev. Elsje van der Merwe (69) was eergisteroggend omstreeks 02:00 besig om
koek vir ’n oggendtee te bak. In ’n stadium het sy omgedraai en twee mans in
die kombuisingang sien staan.
“Ek het vir hulle gesê: ‘Ja?’ Toe rig hy die rewolwer op my,” het mev. Van der
Merwe gesê.
“Hy het gesê as ek nie skree nie en alles doen wat hulle sê, sal hulle my nie
seermaak nie. Ek het begin skree. Hy het my hande vasgegryp, my vloer toe
gestamp en bo-op my gaan lê.”
Intussen het kol. Van der Merwe, Walters, Deleni en Simoné van mev. Van der
Merwe se geskree wakker geword. Die meisies het onder hul bed weggekruip,
soos Walters Deleni geleer het. Walters het kombuis toe gehardloop en die
man gegryp wat bo-op sy skoonma was.
Hulle het begin stoei en breekware en glase in die proses rondgegooi. Dié man
het sy makker geroep om hom te help wat toe ’n skoot in Walters se rigting
afgevuur het. Walters het by die voordeur uitgehardloop.
Kol. Van der Merwe het in die gang in ’n derde man vasgeloop.
Dié man het twee skootrekenaarsakke in sy hande gehad.
Kol. Van der Merwe het met die man begin stoei. Dié man het sy makker
geroep, wat kol. Van der Merwe geskiet het. Al drie is toe by die deur uit en
oor die heining.
Die polisie het ’n soektog na die aanvallers begin. Hulle het inligting
ontvang wat hulle omstreeks 05:30 na die Wonderboom-taxistaanplek
gelei het.
Walters, wat saam met ’n polisievriend gery het, het drie mans opgemerk
wat by ’n taxi gestaan het.
“Ons het in die pad gestaan en hulle dopgehou. Toe al drie in die taxi is,
het my vriend uitgespring, die vuurwapen by die taxi ingedruk en hulle
gearresteer.”
Die mans, in hul twintigs, sal na verwagting vandag in die landdroshof
in Pretoria-Noord verskyn. Die polisie ondersoek die moontlikheid dat
hulle by ander rooftogte in die noorde van Pretoria betrokke was.
